Azkena Rock Festival jaialdiaren aurtengo edizioan ere izango dugu Andre Maria Zuriaren plazan izaten den eta tradizio bihurtu den doako kontzertuen programazioa; ARF jaialdiak musikarekiko duen pasioa partekatzeko modua izaten da programazio hori, musika hiriaren bihotz-bihotzeraino eramanez jaialdiaren bi egunetako goizetan, hau da, ekainaren 19an eta 20an, Gasteizen. Egunero, eta jaialdiaren Mendizabalako emanaldiak hasi baino lehen, Andre Maria Zurian 13:30ean hasiko da festa.
Tami Neilson
Gaur egungo country estiloko artista kitzikagarrienetako bat izaki, askotan Wanda Jackson edo Patsy Cline handiekin ere parekatu izan da Tami Neilson; Andre Maria Zuriaren plazan swingaren festa eskainiko digu artista handiak, bere ahotsaren indar bereziarekin eta bere aldakaren mugimenduaren erritmora. Zeelanda Berrian jaio baina Kanadan hazitakoa, Neilsonek oso gazte ekin zion karrera artistikoari Neilson Family taldearekin, eta Jonny Cash handiaren kontzertuetan hasierako gonbidatu ere izan ziren. Zaleen eta kritikarien babesa lortu du soul, rockabilly, blues eta country estiloen nahasketa koloretsuan letra subertsiboen bitartez askotariko gaiak landuz, hala nola amatasuna, galerak edo misoginia industrian.
Danny & The Champions of The World
Londresen 2007. urtean sortutako Danny and the Champions of the World taldeak heartland rock eta soul estiloen arteko konbinazio perfektua eskaintzen du; izan ere, Danny George Wilson taldeburua genero horiek entzuten hazi baitzen, blues edo doo loop estiloekin batera, eta horien guztien esentzia aurki daiteke bere proiektu guztietan. Eragin horiek kontuan izanik, ez da harritzekoa taldeak estudioan grabatu dituen sei albumak sustrai iparramerikarrak dituen rock zaharrari egindako omenaldia izatea, country, folk, bluegrass, gospel eta rhythm and bluesaren erritmoetan oinarritzen den rock horri egindako omenaldia.
Taldearen hastapenetako doinu eta kutsu folkietan sustrai eta amets amerikarrak ziren nagusi, lehen hiru albumetan: ‘Danny & The Champions of The World’ (2008), ‘Streets of Our Time’ (2010) eta ‘Stay True’ (2013); azken horrek Bob Seger, Tom Petty eta baita Springsteen ere gogorarazten zituen, eta hurrengo ‘What Kind Of Love’ (2015) diskoan gailendu zen Stax zaporea ere hautematen hasi zen. Azken lan horretan abesti biribilak aurki ditzakegu, rock baino soul gehiagorekin, eta atzerako ispilutik E Street Band eta Graham Parker-en sasoi beteko Rumour-ak ikusten direla. Askoren ustez perfektuak diren konposizio horietan Dannyren istorioak kontatzeko zaletasuna da ardatz nagusia, bizitza guztian kontatu izan diren istorioak, gezurrak, rock taldeak eta, batez ere, mundua zein zikina eta zein bidegabea den; urteko diskorik onena izendatu zuten komunikabide askok: Ruta 66, El País, Onda Cero edo NME.
2017. urtean argitaratu zuten orain arteko azken lana, ‘Brilliant Light’ disko bikoitza; hemezortzi abesti berri biltzen ditu eta Dannyk eutsi egin dio soul estiloa ulertzeko bere moduari, baina lehendik ere ezagunak eta arakatuak dituen beste estilo eta lurralde batzuetara eramanez. Disko horretan Grand Drive-aren, folk estiloaren eta Chamions taldearekin kaleratutako hasierako diskoetako amerikanismoen oihartzunak sumatzen dira eta, horri esker, azken hamarkadetan soularen kutsua duen rock generoaren barruan figura garrantzitsuenetako bat izatea lortu du.